李偉然帶埋囡囡打氣 福爾摩斯搏甩髀

猪拉多纳

喺圈內被譽為好好先生嘅李偉然，過往都係自己同班朋友入場睇跑馬居多，不過呢兩季就見佢囡囡好多時都陪埋入場，今日馬主李愛駒「福爾摩斯」再度誓師，相信佢哋兩父女都肯定會入場打氣。
       
「福爾摩斯」準備就緒，馬主李偉然（右）同囡囡又會入場打氣。

其實「福爾摩斯」上季每次上陣，都會見李偉然兩父女在場，而呢匹馬喺英國嘅時候，係佢同著名練馬師倪事和合夥擁有，對隻馬睇嚟自視好高；無奈上季尾一連兩場都係因為排檔差，只以位置交代，不過馬主李就講明隻馬適應得好快，今季好有信心扶搖直上。
       

呢場「福爾摩斯」復出即刻強配韋達，睇嚟唔單止佢兩父女恨贏，就連未開齋嘅蘇保羅都好心急，韋達今季頻頻幫老友開齋，就連有嫡系殺手杜利萊嘅高伯新，首W都係靠佢操刀，睇怕韋達身兼為幕後同練者開齋嘅雙重任務，「福爾摩斯」今場都可以講係擺明車馬。