恒大夫添打殘「太陽神」

猪拉多纳

廣州恒大，亞洲第一，名帥對決，高下立見！今晚亞冠盃4強首回合，主場出擊嘅柏雷素爾需要幾線作戰，現時正值「魔鬼賽程五連發」，硬仗連場隨時踢到殘，面對啱啱躋身亞洲一哥、刻意遷調聯賽專心備戰嘅廣州恒大（馬會譯FC廣州）邊夠砌，吼實1.93倍客勝啱數。

（now670周三晚6:00直播）
中超改期提前赴日備戰

專業足球網站Footballdatabase.com日前公布球會最新排名，廣州恒大壓過沙特阿拉伯豪門希拉爾，登上亞洲No.1寶座，但目標直指亞冠盃盟主嘅佢哋絕無鬆懈，除咗專誠將上周六中超鬥遼寧宏運申請延期，由於颱風「天兔」殺埋身，老闆許家印更出動私人專機，送班球員提前到日本專心備戰。再者南美鐵三角穆里奇、孔卡、艾傑臣候命搏殺，進攻火力夠晒保證，馮瀟霆有望傷愈復出扼守中路，換言之恒大將以最強陣容應戰。

至於以「名帥較量」作口號嘅柏雷素爾，教頭尼仙奴成就同攞過世盃、歐聯嘅恒大主帥納比差幾條街，佢都提醒班球員要集中精神至掂，何況「太陽神」由上周四亞冠盃遠征西亞艾沙比開始，嚟緊14日內要踢5場波，啱啱喺日職被大阪櫻花逼和，進攻核心工藤壯人正選砌盡，體力未必恢復得切，雖然恒大借將基奧今場倒戈，可惜路數被舊隊友睇通，不足為懼。