皇馬讓客斬瓜「切」菜

猪拉多纳

巴利缺陣 C朗更醒神

艾爾切今晚喺西甲主場對皇家馬德里，隨時變成炮灰，因為皇馬唔用加里夫巴利，氣勢似乎更加勁，最近兩場佢做後備同因傷缺陣，皇馬喪入10球、只失2球，而且C朗拿度可以做番主角，當然會更加搏命，「讓球客勝」1.6倍熱都要捧！

（now632台周四凌晨4:00直播）

加里夫巴利登陸西甲後即刻打正選，但皇馬只能夠作客2:2打和維拉利爾，成為開季後唯一贏唔到嘅比賽，點知佢上星期喺歐聯對加拉塔沙雷做後備，日前喺對基達菲嘅聯賽因傷避戰，皇馬就分別以6:1同4:1大勝，C朗更加連中三元後又梅開二度，個人已經連續4場入波，簡直進入瘋狂狀態。
艾爾切5戰未開齋

最近C朗獲皇馬加薪成為全球最高人工球員，地位上已經騎番住加里夫巴利，而且極愛面子嘅佢，趁住對方養傷應該會繼續爆發，證明自己至係巴拿貝球場主人，對家艾爾切日前以1:2不敵奧沙辛拿，開季後得3和2負未開齋，就算借用嘅祖雲達斯前鋒耶當保亞基加盟後入到1球，都唔似阻到皇馬發達囉！