巴利仔未掂皇馬照炸艾爾切

猪拉多纳

今晚續開西甲快車，皇家馬德里則於尾場作客對升班球隊艾爾切。雖然皇馬嘅天價新兵加里夫巴利因傷缺陣，但正好畀因此受益嘅「天使之翼」迪馬利亞騷哥利機會，佢必定搏甩髀，於教頭安察洛堤面前爭取表現，要贏尚未開齋嘅艾爾切兩粒冇難度，熱捧「讓球客勝」。

（now 632周四凌晨4時直播）
迪馬利亞頂檔必搏

上仗熱身時受傷嘅加里夫巴利，安察洛堤指佢會趕及周末同市打吡對馬體會復出，但今仗作客艾爾切肯定倦勤。不過皇馬勝在兵多將廣，尤其係代替「大聖爺」打右翼嘅迪馬利亞，非常珍惜有限嘅上陣機會，唔單止不斷上演助攻好戲，更不惜氣力頻頻回防助守，連之前對佢不瞅不睬嘅主帥安察洛堤都轉晒口風，大讚迪馬利亞為球隊注入無窮動力。雖然自知好難爭得贏「大聖爺」嘅正選位置，但「天使之翼」唔想好似奧斯爾咁離開皇馬，一定會搏到盡，爭取成為「肥安」嘅輪換主力。

上季勇奪西乙冠軍嘅艾爾切，畢竟已經闊別西甲廿四載，點都需要時間去適應高水平聯賽嘅節奏，當然本身實力亦有限，特別係後防集中力不足，經常失大意波，無可避免地要交下學費，開咧五仗未嘗一勝，就算有主場之利都信唔過。睇番皇馬近兩仗用迪馬利亞打正選全勝之餘，合共狂轟10粒着晒火，徹底激活進攻火力，難得今仗「讓球主客和」皇馬只讓一球咁筍，「讓球客勝」不容錯過。