|
|
4個月前韋根喺足總盃決賽爆冷砌低曼城，雙方今晚喺聯賽盃第3圈再續前緣，唔同嘅係家陣韋根面目全非，勢如破竹嘅曼城要報仇，主場有望大勝，1.59倍「讓主」係熱啲，但勝在穩陣！
（開賽時間：周三凌晨2:45）
曼城上周中喺歐聯分組賽大炒柏辛域陀尼亞，前晚就喺打吡大勝曼聯4:1，狀態好到不得了。話就話呢支「億萬大軍」相隔48個鐘就出戰，但曼城勝在兵源充足，領隊比歷連尼亦講明會以輪換制應付呢場聯賽盃，預期傷愈嘅米卡李察士、魯迪維爾同迪斯高都會擔正，呢班二線兵為取悅比帥，今晚仲唔搏命等幾時？
韋根幾條戰線踢到殘
對家韋根今季喺英冠角逐，賽程已經頻密，仲要兼顧歐霸盃戰線，班球員踢到殘，計落就有鋒將格蘭荷特、馬隆尼同卡林麥馬拿文一班十字軍，領隊奧雲高尼就算曉變魔術，睇怕今鋪都難逃大敗厄運。
同晚，車路士會造訪甲組仔史雲頓，「藍戰士」翼鋒桑馬達為證明領隊莫連奴貶佢做後備係錯嘅，今鋪有正選打肯定搏命，由佢夥拍費托攻堅，相信近兩仗勁失5球嘅史雲頓未必頂得住，捧1.77倍「讓客」。
（開賽時間：周三凌晨2:45） |
|
金睛卡
发表于 2013-9-24 12:45
变色卡
显身卡