巴塞「－２」讓客執豆咁執

猪拉多纳

美斯遇華歷簡奴起碼省兩粒

西甲開季4連勝，跟手又大炒阿積士敲響今屆歐聯勝鼓，巴塞隆拿新季火速入局。今晚佢哋重返西甲戰線造訪華歷簡奴，躍身成為歐聯「帽子王」嘅美斯出名係華歷簡奴剋星，呢位「球王」仲話要將勝利獻畀啱啱喪父嘅教練馬天奴，睇怕後防散收收嘅華歷簡奴唔慌有運行，巴塞讓到「-2」照捧2.15倍「讓客」。

（now632台周日凌晨2:00直播）
馬天奴奔完喪趕返領軍

可能唔少球迷都認為今季巴塞後防唔多穩陣，對上兩輪聯賽都分別畀華倫西亞同西維爾(o趙)入兩粒，之不過從周中歐聯大炒阿積士4蛋場波嚟睇，門將域陀華迪斯表現生猛晒，仲撲咗球12碼信心返晒嚟！當然，今場波嘅焦點肯定非美斯莫屬，佢周中連中三元成為歐聯「帽子王」，過去3次鬥華歷簡奴更加場場省兩粒，呢位「球王」家陣有埋尼馬喺前線幫手，今晚隨時又做華歷簡奴剋星！

據《馬卡報》所講，返咗阿根廷奔喪嘅巴塞主帥馬天奴，會由羅薩里奧趕返西班牙領軍，賽前美斯就話全隊上下都支持馬天奴，希望用勝仗帶畀佢力量，鬥心一流。周中由助教柏達素督操嘅巴塞，有中堅碧基因鼠蹊傷缺操，但據講傷勢唔嚴重可以候命，加上佩奧爾亦已經復操，沙維又會復任正選，巴塞前中後三線都齊晒章。

今晚特里薩里維羅球場會幾熱鬧，事關馬德里重金屬樂隊Mago de Oz會喺半場表演，慶祝樂隊成立25周年，之但係亨格比利預計主隊個禁區會更「熱鬧」，皆因華歷簡奴開季4戰已經勁失12球，上仗對住今季戰鬥力大跌Watt嘅馬拉加都要狂吞5蛋，對上兩次主場恭候巴塞夾埋又失咗成打波，相信一場大屠殺在所難免。