拿多大戰難分高下

猪拉多纳

F組另一場困獸鬥，爆發重量級大戰，意甲榜首拿玻里主場迎戰德甲榜首多蒙特，兩軍今季無論組軍模式同季初狀態都驚人地相似，實力接近之餘今晚歐聯第一擊都唔想輸，拿玻里主場受讓有着數，不過黑柴預期和波味濃，求好分頭不如小注博和波。

（有線63台周四凌晨2時45分直播）
傳拿玻里撬羅拔仔

意德雙雄今季做每件事都出奇地相似，拿玻里高價賣走王牌前鋒卡雲尼，但不惜工本引入皇馬三將希古恩、荷西卡利祖同艾比奧爾，另外仲有利物浦門將連拿同燕豪芬射手梅頓斯加盟，實力大為提升，意甲開鑼後3戰全勝，入9球只失2球，高踞榜首。多蒙特今季賣走金童馬里奧葛斯，但同樣使費更多，引入柏柏斯達夫普路斯、米希達利恩同奧巴美揚等猛將，戰鬥力亦告提升，多蒙特喺德甲開咧後5戰全勝高踞榜首，入15球只失4球，同拿玻里真係似到十足十。

今場意德一哥對撼值得期待，多蒙特係上屆歐聯亞軍，經驗稍佔先，但拿玻里有主場之利，機會扯平，如果戰情發展咬得緊，黑柴相信大家都會接受和波各得一分。

另外，今仗賽前突然傳出多蒙特前鋒羅拔利雲度夫斯基將會轉投拿玻里嘅消息。呢位波蘭國腳嘅經理人爆料，最近同拿玻里會長迪羅倫迪斯見過面，大談「羅拔仔」嘅前途，至於傾成點，似乎要睇埋「羅拔仔」今場對拿玻里嘅演出。