格蘭納達棄將畀料 愛斯賓奴睇住食

猪拉多纳

唔少球員都會喺比賽前講幾句鼓勵士氣，但就唔會好似CF格蘭納達守將阿倫尼安咁四圍辣火頭，喺賽前寸盡對手，激起敵人鬥心。加上CF格蘭納達幾名鋒將均受傷患困擾，就算今仗坐擁主場，亦難對季初表現對辦嘅愛斯賓奴讓波，1.55倍「讓客」要撐。

（now632台周日晚6:00直播）
格蘭納達殘陣迎戰

阿倫尼安賽前話自己隊波每個位置嘅人腳都好過對手，明踩對手唔夠班，咁樣得罪晒愛斯賓奴成隊，人哋實同你搏命啦！諷刺嘅係佢笑人冇耐，自己隊波就傳出壞消息。原定復出嘅中場比迪再次整親，射手里基、翼鋒巴謙美賽前又報稱有傷，就算紮住上陣都有所影響，鋒線存隱憂。

愛斯賓奴開季3戰不敗，而且喺轉會市場關閉前借入烏甸尼斯翼鋒加比爾托治。無錯，就係上季借去CF格蘭納達嗰位羅馬尼亞國腳。佢不滿自己今季又被外借，所以一到愛斯賓奴就即刻賣口乖，大講願意為球隊踢任何位置，又話好恨長時間留隊，擺明想高層喺季尾買斷自己，今次仲唔講晒CF格蘭納達所有軍情出嚟表示誠意咩。而且經驗豐富嘅後衞卡迪維拿復出，有助延續不敗場次。