史篤城硬食疲兵曼城

猪拉多纳

史篤城踢法硬淨霸道，正正係曼城花拳繡腿嘅剋星，主場出擊唔赦強敵！今場英超睇牌面梗係曼城高啲，但佢哋國腳眾多，國際賽期後得番半條人命，加上近5次聯賽作客史篤城不勝，讓波捧番主隊！

曼城本季換帥，球隊推進比上季緩慢，新兵除尼格度外表現平平，故開咧後成績麻麻。主力大衞施華，剛於國際賽期受傷今戰上陣成疑，阿古路又要飛返南美比賽，加上隊長高柏尼繼續倦勤，今場作客分分鐘踩蕉皮。
尼桑斯炒車不顧而去

史篤城本季勁連贏3場，而且自08年升班後，英超主場未輸過畀曼城，一班戰將信心爆棚。主帥曉士當日被曼城無情炒魷，肯定懷恨在心，今場球隊有機攞分，細盤亦可兼顧。此外，史篤城中場尼桑斯，前日於曼徹斯特唔守交通規則，令尾隨一架單車失控撞埋佢車尾。單車司機叫佢賠錢，尼桑斯話自己係外國人，個單車手搵唔到佢，並施施然鬆人。最後網民認出肇事者係尼桑斯，目前警方已調查事件。