柏雷素爾大宴親朋 工藤壯人拉埋天窗沖喜

猪拉多纳

日職周五特別場由柏雷素爾主場對磐田山葉，柏軍近期兼顧四條戰線，型仔射手工藤壯人喺忙爆之際宣布婚訊，大軍喜氣沖天，將貫徹近期喪攻打法爭勝。山葉搵嚟前大阪飛腳出擊型左閘安田理大幫手護級，客場出戰都會死攻，玩大盤最好！

（有線61及201台周五晚6時直播）

柏雷素爾近期成為全日職最忙嘅球隊，除應付聯賽外，仲要兼顧亞冠盃、天皇盃同聯賽盃，四線作戰認真誇張。佢哋嚟緊周中要喺亞冠盃遠征作客沙特阿拉伯球隊艾沙比，賽前隊中主將工藤壯人宣布同女伴拉埋天窗，佢話本來自己嘅私事同球會冇乜關係，但依家做咗人老公後感到責任更大，會更落力作賽。自從於亞冠盃八強首回合賽和艾沙比後，柏軍踢法更進取，對上五戰全大，近兩場盃賽同樣入四球，火力好勁。
磐田要護級搵猛將搶分

磐田山葉位列尾二，比尾四球隊甲府風林少九分，護級危急。會方四出搵救兵幫手，近期成功由荷甲球隊維迪斯引入左閘安田理大，呢個前日本國腳出國前効力大阪飛腳嗰陣助攻超勁，家陣重返日職戰場作賽，適應上唔成問題。山葉連續九場聯賽贏唔到，表現真係麻麻，所以佢哋剛於盃賽對住業餘球隊索克斯福井都強陣出擊，最終成功以八比一狂炒對手，經過呢場大勝後，士氣肯定好咗，今次對住柏雷素爾相信會鬥攻全力搶分。

翻查往績，磐田山葉近三次作客柏雷素爾贏晒，三場都係開大，今次兩隊再次碰頭，預期都會大手交易，大盤係投X首選。