德國星級戰將射爆奧地利

猪拉多纳

世盃外圍賽戰火重燃，今晚歐洲區C組就有德國主場迎戰奧地利。雖然德國暫時以5分力壓奧地利、瑞典同愛爾蘭排榜首，不過一向以穩陣見稱嘅佢哋肯定想盡快攞到決賽周入場券，今仗點都唔會留力，撐1.45倍「讓主」。（now632台周六凌晨2:45直播）
小豬葛斯缺陣 高路斯爭破紀錄

德國雖然冇咗中場舒韋恩史迪加同馬里奧葛斯，但仍有一班星級戰將壓陣，前鋒高路斯喺國家隊射手榜以1球之差落後榜首「轟炸機」梅拿，今場有機會創造歷史，你話佢點會唔搏命？至於啱啱加盟阿仙奴嘅中場奧斯爾，為咗證明自己物有所值又好，向賣走佢嘅皇馬會長皮里茲示威又好，點都會踢番場好波，配合擅射嘅湯馬士梅拿、馬高列奧斯等人，試問奧地利後防點頂？

大家咪畀奧地利喺小組6場入15球嘅鋒力呃咗，其實當中有10球係對法羅群島同哈薩克射入。陣中名氣最大嘅鋒將阿拿奧杜域喺德甲打滾多年，有咩路數都畀德軍睇晒，好難惡出樣。而且佢哋下周三就返主場火併主要對手愛爾蘭，成班球員落場好難唔分心囉！

歐洲區C組