幼獅降「摩」捧「讓主」

猪拉多纳

換上新帥修夫基領軍嘅英格蘭U21，今晚會踏出佢重建球隊嘅第一步，喺2015年U21歐國盃外圍賽第1組首戰中，主場迎戰摩爾多瓦U21。「幼師兵團」雖然有幾名主力抽調咗去做大國腳，不過「修哥」今次點兵都仲有曼聯三寶支撐，前線韋費特沙夏、連格同守將米高堅尼都係好波之人，對住實力平平嘅摩爾多瓦當然炒得起，就算讓到2球1.7倍「讓主」要捧！（now621台周五凌晨2:45直播）
修夫基處子領軍

外圍賽其實早喺今年3月已經開打，不過由於賽期同英格蘭U21有份踢嘅2013年U21歐國盃決賽周賽期重疊，所以「幼師兵團」到依家先踢首場分組賽，反而排榜首嘅立陶宛已經踢咗3場有7分添。自從暑假決賽周分組賽3戰全敗後，英格蘭U21主帥位就由皮雅斯換上修夫基，球隊早前同蘇格蘭U21拍跳大捷係由大國腳領隊鶴臣領軍，今晚先係「修哥」嘅處子戰，班小將為討好新帥，又點敢唔搏命先？

人腳方面，修夫基今次揀選嘅25人大軍，不乏高質新星，其中曼聯三寶喺之前紅魔鬼亞洲之旅，大家都見識過佢哋實力。反觀摩爾多瓦U21大軍除咗中場卡達連卡普係喺基輔戴拿模搵食，其他都喺當地聯賽打滾，真係實力有限，今仗又搵乜同幼獅兵砌呢？