一哥水手作客醒放心追

猪拉多纳

上星期出咗外拍嘢，搞到錯過咗日職賽事。我當時真係覺得做香港球迷好幸福，稍為有規模嘅賽事都有本地電視台直播。無得睇就留意手機睇戰報，當知道紅鑽居然喺開波30分鐘就連失三球畀三神，真係難以想像！雖然紅鑽最終都能夠反敗為勝，但班擁躉已經坐咗一轉過山車，亦累班捧場客損手！不過我妹頭唔信邪嘅，繼上星期後今輪再做上盤客，呢次係支持領頭羊水手。

（有線61及201台周六下午6時直播）

水手近期走勢非常強勁，所以能夠喺競爭咁激烈，形勢咁緊湊嘅日職上咗榜首。當然之前友賽險勝曼聯嗰場，就好似同班水手球員打咗支強心針咁。水手呢班波攻力非常強勁，尤其係中村俊輔擅長處理自由球，今場對手鹿角若然喺禁區外大意犯規，就係水手得分嘅良機。

除此之外，射手馬昆奴斯近七場聯賽攻入六球，進一步向日職最多入球嘅紀錄邁進。重有愈戰愈勇嘅齋藤學，球隊攻擊力可謂全聯賽最勁。水手唔只攻擊掂，防守亦都有番咁上下，門將榎本哲也今屆失球數字唔多，當然多得栗原勇藏、小林祐三、中澤佑二同富澤清太郎呢條滴水不漏嘅防線啦！
近三季往績食住鹿角

論近況同陣容，鹿角其實都唔差，但最令人擔心嘅就係佢哋喺對賽往績處於下風，最近三季十次對賽只係贏咗一場！水手除咗贏往績外，今季作客勝出率有成70％咁多，令大家都覺得可以放心捧佢哋場，讓球盤水手小讓平半，一於力撐上盤！
妹頭推介

鹿島鹿角Vs橫濱水手

橫濱水手（上盤）