鄧加失控國體會擺「明」唔掂

猪拉多纳

今季首次喺《太陽波經》同大家見面，「四眼哥」決定倒偶像鄧加（圖）米，推介佢教嘅國體會對家明尼路，撐「讓客」。（開賽時間：周一清晨5:30）

想當年，一把年紀嘅鄧加帶領磐田山葉喺香港大球場KO快譯通，「四眼哥」喺現場睇到熱血沸騰，呢位前巴西國腳剛柔並重，玩腳法可以一個扭你幾個、玩硬淨亦可以一個爆你幾件！

上仗失分想打執波仔
不過，同笠臣、曉士、古列治一樣，偶像鄧加似乎都係踢波叻過教波，連巴西國家隊都教得麻麻哋嘅佢，上年十二月返番去出身球會國體會做教練，結果球隊以第10名衝線。今季國體會起步算唔錯，一直位處前列，但唔知做乜，上月底輸完畀紐迪高後變咗和波專家，連續三場和波拎得3分。眼見隊波突然走樣，偶像啲火就嚟喇，上場作客落後緊畀保地花高嗰陣，佢竟然失控想郁人哋個執波仔，之後仲畀電視台影到佢一路行出球場、一路「問候」人，認真肉酸。

眼見波士失分失到失控，國體會班球員會唔會受影響，「四眼哥」唔敢講，但本來人腳已經唔多充裕嘅國體會，近期陷入傷兵潮先係踢極唔曉贏嘅主因。據報國體會前中後三線都有主力打柴，當中防線更加係重災區，即使有主場之利，面對由朗拿甸奴領軍嘅明尼路，如果和波都已經執到，不過「四眼哥」就睇死佢哋會輸埋囉！