華倫上力摧殘馬拉加

猪拉多纳

經過漫長嘅暑假，新季西甲今晚開鑼喇！「張峰」今季非常期待巴塞「美斯+尼馬」嘅組合，唔知兩位球王會產生咩化學作用呢？講番今晚華倫西亞主場迎戰馬拉加場波，「蝙蝠兵團」季前雖有入球保證蘇爾達杜轉投熱刺，但喺幾場熱身賽中仍顯示出不俗鋒力，主場出擊絕對有力旗開得勝，全取三分，狼啲撐「-1」2.15倍嘅「讓球主勝」。（now632台周日清晨5:00直播）

馬拉加星散靠老將孭飛
華倫西亞季前踢咗7場熱身賽，戰績係3勝1和3負，經過頭4場不勝後連贏國米、愛華頓同奧林比亞高斯，3場勝仗攻入7球，反映狀態一直處於冒升當中，兼且鋒力仲Keep到，都算把炮咯！今季由薩拉戈薩來投嘅普斯迪加，雖然「卡士」同離隊嘅蘇爾達杜爭咁啲，但勝在經驗豐富，配合留隊嘅希度華迪斯、班尼加，「蝙蝠兵團」嘅鋒力絕對唔可以睇小，話唔定呢對拍檔今場就可以齊齊開齋，做贏波功臣呢！

上季開始一度同財困兩隻字扯上關係嘅馬拉加，大家熟悉嘅名字包括祖亞昆、巴迪斯達、沙維奧拿同迪米捷利斯等等，全部走晒！就連有料教練比歷連尼都走埋去曼城，新星艾斯高又畀皇馬收歸旗下，馬拉加今季只係靠老將辛達告魯斯孭飛，唔係話呢位射手冇料，只係擔心佢獨力難支啫。始終成隊波好似畀人肢解咗咁，好傷o架！今晚作客去到華倫西亞，帶埋個籮去載「蛋」啦！