外流兵搶韁日本打「烏圭」

猪拉多纳

本田圭佑「騷哥利」博轉會
日本今晚喺宮城縣同烏拉圭踢熱身賽，其實係東亞錦標賽冠軍對洲際國家盃殿軍。上個月日本派「國內組」出戰，都能夠威得出，今次有「海外組」歸隊，自然唔衰得，特別係新國寶本田圭佑要盡最後努力，爭取表現博AC米蘭簽佢，撐日本W！（有線61及201周三晚6:20直播）

由於東亞錦標賽神射手柿谷曜一朗同MVP山口螢繼續入選，搞到成班日本國腳勁緊張，佢哋把口話歡迎新血加入，實則好怕自己位置被取代，今場當然要踢好波畀教頭沙哲朗尼睇吓。另外，王牌香川真司要以實力向曼聯新領隊莫耶斯證明，自己夠料打英超，山長水遠飛返日本，當然唔會Hea踢。

烏軍缺射手卡雲尼
仲有呀，最近本田圭佑恨去AC米蘭恨到出面，仲放風話肯減薪加盟，當然要把握機會「騷哥利」，報道話佢操練後，拉埋沙哲朗尼傾咗20分鐘，證明好想發圍。另一方面，烏拉圭有射手卡雲尼因傷避戰，前鋒蘇亞雷斯扭計轉會畀利物浦雪藏，狀態可能受影響，淨係靠老將科蘭，未必夠日本砌喎！