莫耶斯哥帥坐熱櫈唔使驚

猪拉多纳

所謂熱櫈（Hot Seat），其實係指難以應付嘅職位。就現今歐洲球壇嚟講，曼聯領隊莫耶斯以及拜仁教練哥迪奧拿就坐緊Hot Seat。有句說話叫高處不勝寒，但Peter可以同你講真正勁人係唔會怕寒。若果莫耶斯以及哥迪奧拿可為球隊取得佳績，就能真正向全世界證明自己係有料之人，向住殿堂級進發。老實講，曼聯以及拜仁有大把好球員，加上個個都經驗豐富，球隊已有齊奪冠嘅最基本元素。莫耶斯同哥迪奧拿又使乜擔驚受怕吖，驚咪兩份囉！

默默耕耘 終會成功
暫時兩個名帥嘅初步印象都唔錯，先講曼聯莫耶斯，「紅魔鬼」剛啱訪港遇着質素麻麻嘅大球場草地，但莫耶斯都冇左彈右彈，如常保持認真態度，為球隊作好備戰工作，暑期收購球員計劃係就係唔太順利，但莫耶斯都冇批評或不滿，繼續默默耕耘做實事。哥迪奧拿一樣，德甲首戰就帶領拜仁贏波，總算有個好開始。咁究竟兩個領軍之人可唔可以取得大成功，成就拍得住上手主帥費Sir以及軒歷基斯呢？依家講當然係言之過早啦，睇完兩個球季之後再作評論都未遲。