「暴發」摩納哥恰死波爾多

猪拉多纳

「暴發戶」摩納哥今晚會迎來回歸法甲首戰，作客上季中游分子波爾多，呢支升班球隊今夏大灑金錢買入法卡奧、摩天奴同杜拿蘭等星級球員，無非想達成奪得歐聯席位嘅目標，小妹相信以佢哋嘅陣容有力打響頭炮贏波，2.25倍客W信得過！（now714台周日凌晨3:00直播）

王牌法卡奧熱身賽對辦
摩納哥今夏豪花近1.3億歐元狂掃「名牌貨」，由雲尼亞里領軍嘅陣容絕對唔差得過巴黎聖日耳門，難怪PSG新帥白蘭斯都話佢哋係今季爭標最大勁敵。不過唔知係咪雲帥落咗柯打，摩納哥成班球員個個都只係話以歐聯席位為目標，絕口不提爭標，似乎係想幫球隊減壓，踢得冇咁緊張，發揮自然更理想啦！

況且王牌前鋒法卡奧加盟後表現對辦，4場季前賽共省入4粒，對住熱刺更加梅開二度，絕對有力延續上季歐洲第3射手嘅威勢，拍住占士洛迪古斯等攻擊手，要射爆波爾多根本冇難度。波爾多上季表現不過不失，但今季陣容變化唔大，最大手筆嘅收購只係由堤格雷買入左閘盧卡斯奧班，要同法甲爭霸分子嘅摩納哥鬥，真係難啲喇！