巴利回歸熱刺玩謝富咸

猪拉多纳

英超倫敦打吡戰今晚連環爆發，熱刺喺主場對富咸，吼實2.15倍「讓球主勝」有着數。熱刺今場有「齊天大聖」加里夫巴利復出，唔憂冇波入，而且富咸領隊祖爾回歸英超後3次領軍倒戈，全部輸晒，要唔過喎！

（有線201及301周日晚11:00直播）
祖爾領軍3次倒戈全敗

熱刺喺歐霸盃幾乎被國際米蘭反勝淘汰，原因當然係加利夫巴利停賽，呢場佢可以復出，叉足電肯定當富咸後防紙板咁扭。除此之外，今季加盟嘅中場丹普西，據講傷勢好轉可以候命倒戈出戰，開季前佢原本想轉會利物浦，點知畀富咸高層嗌停去唔成紅軍，有得落場嘅話，梗係唔會同富咸客氣啦！

另一方面，富咸都有領隊祖爾同射手貝碧托夫倒戈，不過佢哋對住熱刺，根本冇好下場，特別係祖爾上季重返英超後，3次領軍對熱刺全敗，每場至少淨輸兩球。相反，迪科爾對住富咸就特別嗒糖，連續3次對賽有波入，呢場好可能又用士哥「歡迎」祖爾回歸白鹿徑球場，既然係咁，當然要捧「讓球主勝」。