皇馬大鬧蝙蝠洞

猪拉多纳

作客華倫例演入球Show

今晚西班牙盃8強次回合爆發「大」戰，三日前先喺聯賽畀皇家馬德里血洗五球嘅華倫西亞，續喺主場迎戰「銀河艦隊」。其實華倫西盃首回合只係落後兩粒，唔係冇得追，一定會搶攻，皇馬大勝後亦信心爆棚，C朗、希古恩、迪馬利亞個個着晒火，況且近6次作客「蝙蝠洞」例演入球騷，大盤非常好路。

華倫西亞上仗聯賽半場就畀皇馬閃擊五球，雖同球員心繫西盃以致失魂不無關係，但輸得實在太肉酸，若想同粉絲交代，最好就係力爭喺西盃晉級。「蝙蝠兵團」首回合表現唔曳，前鋒蘇爾達杜幾次進攻被誤判越位，最終淨吞兩蛋有啲唔抵，為收復失地焗攻冇數講。

然而，華倫呢種冒險踢法，卻正中皇馬下懷，唔計反擊尖刀C朗同迪馬利亞，淨係希古恩喺馬斯泰拿球場比賽就寧舍醒神，已經累積6個士哥，平咗名宿迪史堤芬奴嘅紀錄，絕對係「蝙蝠殺手」。
中位數2.5勁抵玩

皇馬近6次造訪「蝙蝠洞」都殺得天昏地暗，全部開大之餘，當中不乏3比6、0比5、2比3等大手交易。由於形勢使然，雙方為晉級唔會保留，難得今仗大細中位數仲係2.5球，大盤有買趁早。