夏利叔倒戈誓拔頂心刺

猪拉多纳

夏利列納上年畀熱刺解僱，激到佢老人家紮紮跳，今晚夏利叔帶領昆士柏流浪（QPR）倒戈熱刺，當然想將悶氣一次過發洩喺對手身上。其實自夏利叔上任之後，QPR表現確有明顯改善，月初更曾擊敗強隊車路士，今次對熱刺有望取分，受讓半一揀下盤。

（有線300及200台周六晚8時45分直播）
接手QPR有起色

昆士柏流浪人腳其實唔差，未能於聯賽交出好成績只怪上手領隊曉士領軍無方，如今經過夏利列納悉心調教之後，球隊已與上半季有明顯分別，起碼比上半季更加團結，護級必有幫助。

再講，夏利列納曾經執教過熱刺，現時陣中有唔少球員都同佢有合作經驗，相信夏利列納可制訂一套良策，以減低迪科爾及加里夫巴利嘅侵略性。熱刺已經連贏四場，領隊保亞斯更獲12月英超最佳領隊，但要留意所擊敗嘅對手實力唔算太強，熱刺讓半一唔穩陣。