英軍「+1」劏牛

猪拉多纳

12/11/2011
文： 樂比堅尼

香港時間周日凌晨上演一場重量級國際熱身賽，由英格蘭主場迎戰「狂牛」西班牙。如日方中嘅西班牙，雖然係世界排名第一兼應屆世界盃及歐國盃冠軍，但近幾年征戰頻繁，鐵人都有倒下嘅一日，如果連呢啲無關痛癢嘅熱身賽，作客對英格蘭呢啲勁旅都唔輸，真係唔知等到幾時，英格蘭主場受讓好路，樂比仔推介「讓球主勝」。（now 671周日凌晨1時15分直播）


英格蘭新星爭上位


英格蘭今次對西班牙徵召多位新人，老大哥朗尼、謝拉特同里奧費迪南冇入選，不過仲有泰利同林柏特擔大旗，加上韋碧克、史杜列治、菲爾鍾斯等新秀，勝在活力十足，而且架構簡單，新人為咗爭上位踢明年歐國盃決賽周，肯定會更加賣力，效果隨時好過出主力踢。




西班牙近年橫掃球壇，但自從奪得世界盃後，霸氣明顯有所減弱，特別係踢熱身賽，早前就作客輸過畀意大利，可見佢哋絕非天下無敵，雖然西班牙今仗精銳盡出，大部分主將悉數入選，但正正因為太過強陣，呢班球星平時喺球會已經踢到足相當攰，好似法比加斯、沙維、恩尼斯達、韋拿及佩奧爾兩日前先踢完西班牙盃，依家仲要踢太公波，真係攞人命咩！


西班牙頻撲現疲態


其實西班牙踢法咁幼細，最怕就係英格蘭呢類踢法硬朗嘅球隊，尤其係今場只屬熱身賽，預計西班牙班球員都唔會太搏命，佔主場之利嘅英格蘭隨時攞到甜頭，睇番英格蘭近廿年間六次交手三次主場對西班牙成績，一勝一和一負唔失禮，今場受讓確實值得一試。