高清睇跑馬：風之子1000米專家

博彩老头

　　「風之子」來港後腳傷嚴重，甚至一度有生命危險，幸告仔不肯放棄，經其悉心料理傷患已無礙，上季取得上佳成績，先喺總場次310首次上名，接戰總場次 346谷草1000米開齋，雖因「美猴王」受阻才僥倖獲勝，但單憑一條直路追過對手絕對唔簡單，尤其直路於內檔衝刺，左穿右插，非有超強鬥心不可。之後輸一場回氣，接戰總場次445同程再建一功，該役同樣後上勁強，但已唔使留得太後，且贏得更輕鬆，按韁之下大勝次名馬兩個多身位，蹄下敗將「包裝猛將」及「金紫荊」都有一定分量。翌仗總場次501降格跑第二，負重磅而影相飲恨雖敗猶榮。其後兩戰分別跑谷中1200米及田草1000米，路非所長，不用介意。周三跑番谷草1000米首本路程，又可重開勝門。

高飛飛決心補中

　　「高飛飛」上季不斷改變跑法，換路程，終於搵啱方法而取得突破，跑法唔再係一味搶放，或者留到最後，改為走中叠位置搵遮擋，配備亦統統唔用，結果總場次679田草1000米首次上名，到上季拉士一戰總場次743，更在谷中1200米贏馬開齋，該場九檔起步形勢絕不理想，亦大半程走出三叠，最後彎位仲要兜出大外檔，蝕位咁多照贏可也，已顯示實力唔差，不過始終只贏四班賽，故今季首戰總場次035谷草1200米，排二檔亦備受冷落，但繼續有好表現，而且在1000米處一度勒避，繼而搶口耗力甚多，跑第二水準亦高，周三吼準贏馬路程而來，決心補中。

Sam