洪禮賢講馬：爪皇盛水 惡氣十足

猪拉多纳

　　第九場三級賽1400米。「友誼至上」近兩季目標好清晰，都係吼住國慶盃作為首戰，前季124磅輕勝「厚利多」、「新力勁」，上季負122磅，則唔係因對手強屈居人後，而係輸在際遇，若果唔係塞到最後200米，仲要左搵右搵位嘅話，頭馬必然唔係「再領風騷」，因為，睇番當時前幾名之中，拉士只係得「友誼至上」可以愈追愈勁。今季在準備上同去季差唔多，論態有番咁上下，如果唔係因為129磅讓唔起一批輕磅馬，應贏。

　　第十場三班1400米。「爪皇盛水」上季初出由頭錯到尾，仍有接近演出。而季內初出，壞習慣係有改善，雖然出閘仍然「甩咳」，途中都係唔多留得住，但操控上已比上季乖巧了，唔多見到上季彈吓彈吓嘅走規。希望有過一場熱身賽幫忙，洩一洩火，陣上可穩到走勢，同時，路程加長更啱追。只要12檔唔係令佢置身甚為不利處境，以佢嘅後勁，呢批對手唔會頂得住。