馮諾嘉手記：天下寶落班起筷

魑魅魍魉

　　剛戰大摩認真威水，憑「步步穩」同「爆冷」贏出冠軍一哩賽同女皇盃，兩駒繼07年後再次奪此盃，證明老當益壯。

　　而剛戰另一焦點，係韋達同柏寶兩大高手同日較勁，結果各贏一場，前者憑「盈彩繽紛」贏馬，後者亦贏咗一匹「蜚聲」，暫時韋達仍領先柏寶三場頭馬。不過，今戰起韋達將停賽四日，相信柏寶一定會發力急起直追，聽晚柏寶騎足八場，當中有唔少機會馬，值得從中揀選捧場對象。

　　第五場四班1200米，小妹鍾意柏寶坐騎「大進」，雖然近兩仗跑田草1400米冇表現，但睇番季內唯一贏馬嗰場就係跑谷草1200米，證明窄場威力較強，今場形勢同贏馬時差唔多，同樣係排二檔兼配柏寶，隨時可以重溫贏馬好夢。對手方面，「成功網絡」、「卡加精神」同「祥勝愛駒」三駒上仗均贏馬，可以一併吼實，四連環揀埋落班跑嘅「靚得開心」。

　　至於第六場四班1650米，同樣睇好柏寶坐騎「天下寶」，季初試過響同程彈甩「精英財星」三個幾馬位贏馬，雖然之後上到三班一直冇表現，但當中有幾場都輸唔遠，今次終於減夠分落番四班跑，即刻報爭贏馬路程兼強配柏寶，用意相當明顯，同場對手唔算強，有權取回久違嘅頭馬。

　　配腳方面，「蓋世子牙」跑法被動，所以一直易位難贏，但後勁的確唔簡單，一定要拖。「勝任有餘」、「永得勝」近仗皆有表現，都係實力分子。「越戰越勇」近仗響同程試準晒走勢，隨時可郁手。