烏拉圭唔掂 巴拉圭W得

猪拉多纳

B組早輪先演「雙圭大戰」，烏拉圭激戰巴拉圭，烏拉圭今屆冇咗蘇亞雷斯即刻唔掂，唔好話入波，就連攻勢都組織唔到，今場後防又有高甸因儲夠黃牌要停賽，受讓嘅巴拉圭當然捧得過，再進取啲博巴拉圭W都仲得。（now 681周日凌晨3時直播）
卡雲尼冇貨交 高甸停賽

烏拉圭冇咗「哨牙蘇」，諗住靠另一大將卡雲尼孭飛，點知呢位人兄原來踢大賽真係冇料到，舊年世界盃4戰只入1粒，嗰球仲要係12碼添！嚟到今屆美洲盃又係咁，齋都開唔到，搞到烏拉圭兩戰入得1球，首戰對住弱旅牙買加要靠中場基斯甸洛迪古斯入波險勝，所以好難怪上場會輸畀阿根廷囉！烏拉圭今場靠邊個數胡真係好難睇得透。

反觀巴拉圭就士氣高昂，首戰落後兩球都能逼和阿根廷，跟住對牙買加亦順利贏出。呢隊波冇錯係多老將，不過正正就係因為今屆可能會係呢班老將最後一屆美洲盃，踢得一場得一場，為免留憾梗係同你死過啦！撞正烏拉圭今場有後防領袖兼隊長嘅高甸要坐波監，冇前又冇後，真係益晒巴拉圭啦！