巴塞戰友倫敦聚頭 A山法比英雄對決

猪拉多纳

今晚阿仙奴喺主場對車路士，係佢哋阻止對方重奪英超冠軍嘅最後機會，到底係兵工廠展開奇迹大逆轉序幕，定係車仔擴大領先優勢帶到尾，就要睇兩隊嘅超級英雄有咩神奇力量。阿歷斯山齊士登陸英超後簡直超人上身，法比加斯就變身蝙蝠俠重返酋長球場，呢對巴塞舊戰友交鋒唔係唔睇呀！

咪以為超人同蝙蝠俠身處唔同世界，佢哋會喺出年上映嘅荷里活大片相遇，兩個超級英雄仲會打餐死！現實世界中，阿歷斯山齊士同法比加斯上年喺巴塞隆拿做隊友，就算進攻數據有幾好都得唔到重用，遭遇都幾相似，點知佢哋離開西甲後，就喺英超變咗倫敦死對頭。
超人A山撐起廠仔

兵工廠上半季受到嚴重傷兵問題困擾，A山獨力撐起全隊建立超人形象，上星期阿仙奴喺足總盃4強加時後以2:1砌低雷丁，佢更加梅開二度，今季上陣45場有22個入球加11次助攻，進攻效率驚人。領隊雲格仲撐佢壓倒車仔嘅夏薩特，當選今季英超最佳球員添。

除咗好波，其實A山都好識提升士氣，賽前佢狂讚兵工廠多勁人：「咁講唔係因為我効力阿仙奴，而係真心覺得。」另一方面，法比加斯重返英超同樣證明自己嘅價值，暫時喺聯賽有16次助攻。佢戴面罩變蝙蝠俠上陣後，對住昆士柏流浪仲即刻打破入球荒，勁！
蝙蝠俠法比仔 首度「酋長」倒戈

今次係法比加斯離開英超後，首次重返酋長球場倒戈。賽前有廠迷話，酋長球場外唔應該再放法比加斯巨型海報，話佢唔配有咁嘅待遇，搞到法比加斯起火還擊，暗示佢効力兵工廠8年得個吉：「我27歲都未攞過英超冠軍，我哋唔會畀阿仙奴有任何希望，」