馬房秘聞:（探子）七星仔胃口大開

不死鸟

▲雖然話韋健仕家有喪事，將要返祖家出席喪禮，但聽日仍然可出賽，噚朝仍見呢位騎師響晨課露面，除替「尚方武士」快跳兩段外，亦過檔部分下周三原由其出策的戰駒，睇見騎者面露笑容，估計應心中有馬，臨場必須吼實。
　　▲馬會位於沙田嘅檢疫馬房，噚日下晝舉行拜神儀式，除馬會行政總裁應家柏有份出席外，多位練馬師亦有到場，祈求日後馬匹檢疫時過程順利。
　　▲「七星仔」馬主日前曾入馬房探班，獲悉近期天氣轉涼，愛駒胃口亦有改善，馬身仲比以往結實咗。手足話呢匹細粒仔近期馬身轉壯係一件好事，今次同廐侶「快都」交換賽程報名上陣，幕後都有一定信心，值得吼實。
　　▲「鐵哥們」馬主上周入咗馬房探班，獲悉此駒以往由於情緒緊張，引致腸胃欠佳，但近期馬房不時安排下晝遊花園，已令情況有改善。「鐵哥們」熟習環境後食得操得，近期火氣旺盛，為免馬匹打腳令到蹄鐵鬆脫，練者仲特登吩咐釘甲師傅替此駒加釘，務求令呢隻馬跑出最佳水準。
　　▲「鼓浪天風」馬主昨日下晝入倉探班，馬房特登安排提早游水。馬房認為呢匹馬跑至季尾狀態已經回勇，今仗用梁家俊減磅上陣，有機會食尾胡。