華將頭頭碰着黑 鄭雨滇一傷再傷

猪拉多纳

剛季洋將盡領風騷，華將則頭頭碰着黑。上年6月，鄭雨滇策「樂融融」墮馬跌斷左手，剛季長期養傷，直至3月尾才復出，但跑唔夠一個月，又因手指骨裂，缺陣之餘亦未能出席晨課，無奈提早抖暑。另一位華將楊明綸，季初氣勢如虹，更初次代表香港出戰騎師錦標賽，但12月底開始行衰運，策「齊得戚」墮馬，養傷兩個月，復出不久騎「中華寶貝」又落樓，提早收咧，幸好季尾已恢復操馬，新季開鑼可望復出。華將一哥蔡明紹成績倒退之餘，並惹上官非，因襲擊旅遊巴司機被判罰款三千元。
       

季內先後有多位華將被重罰，湯智傑策「愛的呼喚」未盡全力，罰停賽8日；蘇狄雄策「團隊精神」亦犯天條，但因有前科，已是第三次違反相關賽例，被重罰停賽16日。賴維銘策「金鹿」在陣上與郭能互有動作，結果被罰停賽7日，郭能亦罰5日，但其後上訴得直。