基迪拉捐獎金救助貧民

猪拉多纳

基迪拉當選2013年德國足球形象大使！呢個獎項由球迷票選誕生，藉此表揚外流球員為建立德國足球形象作出貢獻，皇馬中場基迪拉喺獲得眾多擁躉支持下，最終擊敗高路斯、梅迪薩卡、奧斯爾等星級同鄉稱王，難得佢攞獎後不忘行善，承諾將獎金獎品捐贈皇馬基金會，協助貧苦大眾。
榮膺德足球形象大使

對於當選德國足球形象大使，基迪拉難得相當興奮：「我好高興奪得呢個殊榮，我要感謝嗰啲投票畀我嘅球迷，得獎後會激勵我變得更為出色，因為我代表緊德國足球。」其後佢亦趁機發表效忠「銀河艦隊」宣言：「獎項足以證明我過往喺皇馬表現唔錯，我好開心仍然効力皇馬，更希望自己可以繼續効力好多年。」

至於面對莫迪歷、伊拿拉文迪及卡斯米路爭奪中場正選席位，基迪拉亦有獨特睇法：「任何球員都能夠落場，對我哋嚟講極為重要，我哋擁有好多高質素球員，當然會揀狀態弗爆嘅球員落場，呢種感覺無疑好幸福。」思想態度都咁正面，基迪拉抵你當選嘅！