拜仁超班「-2」照炒陸軍

猪拉多纳

歐聯踏入分組賽階段，今晚D組有衞冕嘅拜仁慕尼黑主場迎戰俄羅斯球隊莫斯科中央陸軍，呢支德甲班霸嚟到歐聯賽場，以哥迪奧拿嘅功力加埋球員質素，大勝一場根本冇難度，讓兩粒都照捧1.95倍「讓主」啦！

（有線63周三凌晨2:45直播）
「小豬」傷愈復出

哥迪奧拿一個西班牙人嚟到不嬲心高氣傲嘅德甲三冠王，面對高層、傳媒、球迷圍攻，日子注定唔易過，好似前日體育總監森馬就插班波冇進取心，何況今晚係佢上任後首場歐聯，點都要交足功課嘅！先唔講佢嘅歐戰經驗非常豐富，更重要嘅係「小豬」舒韋恩史迪加完全康復，今場可以復任防中，唔使再依賴拿姆客串，相信成隊波今場無論進攻組織定防守上，都會更有睇頭，加埋近4場入3粒、踢到着晒火嘅歐足先生列貝利同洛賓，要炒起中央陸軍延續主場15連勝嘅佳績，絕對冇難度。

莫斯科中央陸軍喺聯賽嘅戰績的確有睇頭，繼續保持「一哥」位置，可惜佢哋作客表現反覆，近6戰只得2勝，加埋中場主力本田圭佑屢受轉會傳聞影響，話對士氣冇打擊就假啦，今場對住歐洲巨人拜仁，睇怕只會落得慘淡收場。