皇馬「20億雙翼」 強掃雷

猪拉多纳

星光熠熠嘅皇家馬德里今晚隆重登場，喺歐聯B組首輪賽事作客土耳其勁旅加拉塔沙雷。由於皇馬球星如雲，所帶來嘅經濟效益甚為可觀，《福布斯》更稱「銀河艦隊」市值高達25.6億歐元（約264億港元），穩站全球足球隊嘅「冧巴溫」，面對近況低迷嘅加拉塔沙雷，兩大天價巨星加里夫巴利夥拍C朗實攻到你有氣冇碇抖，斯維強捧「讓球客勝」。

（有線64及203台周三凌晨2時45分直播）

皇馬會長皮里茲係一名生意人，深明小財唔出，大財唔入嘅道理，因此不惜斥巨資收購巨星，為球隊帶來無限商機，日前《福布斯》公布最新消息，由於皇馬上季總收入有5億歐元（約52億港元），升幅5.5%，令佢哋市值升至25.6億歐元，高踞全球足球隊嘅榜首，單計眾將身價加埋有成5.25億歐元（約54億港元），兩大天王加里夫巴利及C朗組成接近20億港元嘅雙翼齊飛，上輪西甲對維拉利爾各建一功，巴利仔首度亮相即有士哥，漸見威力，可惜未能贏波而回，谷埋成肚火，誓要在歐聯賽場證明身價。
加拉塔沙雷褪色山寨王

加拉塔沙雷雖然有「魔獸」杜奧巴及荷蘭中場史奈達坐鎮，可惜球隊近況下滑，其中史奈達以往一針見血嘅妙傳愈來愈少，前鋒喺缺乏支援下，近三場聯賽全數打和只入兩粒，失去昔日山寨王嘅霸氣，連土超都未踢得掂，點樣喺歐聯應付來勢洶洶嘅「銀河艦隊」呢？

況且皇馬踢走奧斯爾、確立「金童」艾斯高為核心嘅踢法，令中前場進攻不再雜亂無章，組織更加順暢，面對「冇牙老虎」嘅加拉塔沙雷可打響頭炮，「讓球客勝」非常值博。

猪拉多纳