慕遜加柏 賀芬咸演入球騷

猪拉多纳

德甲踢完前四輪之後，邊兩支球隊入波最多？相信唔少人都會「覺得」係拜仁慕尼黑同多蒙特，但事實入波最多竟然係今晚對撼嘅賀芬咸同慕遜加柏！呢兩支娛樂性十足嘅球隊今季大玩「有前冇後、打死罷就」，既然雙方都擺到明要以狂攻嚟娛樂球迷，今場唔捧「入球大」仲點對得住自己呀？

（有線61、64、201及203周日晚9:30直播）
兩隊入波冠絕德甲

主場出擊嘅賀芬咸頭4場波入12球，鋒力冠絕整個德甲，新星前鋒禾蘭嘅爆發絕對係主要原因，呢位7月先至21歲生日嘅前鋒連續3場聯賽都有波入，就連啱啱代表德國U21對捷克都梅開二度，撻着咗想勒都勒唔住啦！不過賀芬咸頭4仗合共嘅失球同樣係12球，同樣係德甲失波最多球隊，睇佢哋踢波點可能會少士哥？

賀芬咸夠癲啫，最重要係作客嘅慕遜加柏都陪佢哋一齊癲，前四場聯賽錄得10個入波同8個失波，作客拜仁慕尼黑同利華古遜都夠膽死主攻，結果佢哋如願以償場場入波，但就付出輸1:3、2:4嘅慘烈代價，艾蘭高、拉菲爾基達奴同麥斯古斯呢個「三叉戟」上仗齊齊有士哥，信心爆棚，肯定同賀芬咸死過。
頂占筍盤：賀芬咸（入球大）