144歲2Top擔大旗 櫪木主場難贏札幌

猪拉多纳

櫪木SC今日出動一對成144歲嘅「雙箭頭」，主場迎戰札幌岡薩多，真係想贏都難，平手盤博硬1.87倍嘅札幌客勝！

（開賽時間：周日下午5:00）

櫪木家陣排喺日乙第14位，降班威脅唔大，不過就唔上唔落，結果搞到前任監督松田浩要劈炮。本來主帥唔撈冇乜大不了，點知櫪木唔知為慳錢定真係搵唔到人，居然由CEO松本育夫親自接棒，佢老人家已經成71歲人，即刻就創咗個日本聯賽史最老監督嘅紀錄。至頂癮嘅係，新任強化部長上野佳昭仲老過佢，今年已經73歲，兩位耆英加埋成144歲，畀日本傳媒形容係「史上最高齡2 Top」。
對賽札幌佔優

老人家教波未必唔掂，費格遜咪一樣咁醒，但係櫪木近況好沉吓，聯賽已經兩連敗，呢個時候需要激情帶番起隊波，搵兩個阿爺出嚟可以畀到隊波衝擊？你信？我唔信！

查實講往績，櫪木對住札幌已經輸咗八成，對方對賽8次，櫪木只得1勝2和5負，以往兩次响9月份交手，仲全部輸晒畀札幌，今日至叻都係望打和，平手冇理由博隊無希望嘅球隊。