「雙城記」首球吼「藍月亮雙尼」

猪拉多纳

今晚英超史篤城主場與曼城合演「雙城記」，首名入球吼實「藍月亮雙尼」耶耶托尼、尼格度。

史篤城喺英超揭幕戰不敵利物浦後，目前正值3連勝睇落好Fit，不過佢哋喺聯賽淨係入過3球，而且入波嘅賓納、查理阿當同梳爾哥斯全部都唔係箭頭。除咗前鋒高治場上「失蹤」，堅韋尼鍾斯呢排雖然入唔少波，包括英聯盃鬥甲組仔華素爾連中三元，同埋早前熱身賽為千里達兩場入3球，可惜返到英超即時冇貨賣，至今仲未開齋。

對家曼城雙箭頭阿古路同迪斯高至今演出唔算標青，再者「首球」賠率分頭咁低亦唔多值博。相反喺中場助攻助守嘅耶耶托尼，喺曼城今季兩場聯賽勝仗都有份入波，值得冷敲。

至於新援尼格度則接替迪斯高成為「後備殺手」，最近兩場後備入替都有波入，上場鬥侯城更係靠佢「首球」打破悶局，今晚玩「首球」千祈咪錯過「藍月亮雙尼」！