保地花高圍攻殘陣哥連

猪拉多纳

保地花高聽朝喺巴甲迎戰哥連泰斯，主隊恨入波恨到發燒，即使贏緊都係咁喪攻，比起連續兩戰「食白果」兼有主力缺陣嘅哥連，保地花高嘅狀態明顯好好多，主隊讓平半，一於捧1.85倍上盤啦！

（開賽時間：周四早上8:50）
哥連泰斯雙箭未必歸隊

利物浦用「1:0戰術」成功喺英超3場全勝登上榜首，場場都入1粒就龜縮，雖然話贏到波就得啫，但有咩差池隨時「臨尾香」嘛！保地花高就唔同喇，佢哋成班人都對入波鬼咁執着，上仗領先後冇話踢守勢波，點不知就畀人一個突擊追和，好彩伊利亞斯費豪喺補時階段建功，最終有驚無險以2:1擊退基斯奧馬，賽後教練奧利華拉仲激讚班手足添：「呢場波贏得最型嗰個位，係全隊都勁想入第2球呀！」除咗費豪，拉菲爾馬古斯同侯利亞哥斯達都係數胡能手，憑住呢種鬥心，照計可以延續近10次主場不敗嘅佳績嘅！

客軍哥連泰斯連續兩場冇波入，最弊係今仗佢哋除咗有主力前鋒柏圖同荷西古里路踢完國際賽九成趕唔切歸隊，就連進攻核心丹尼路亦跌晒Watt，今季踢咗15場聯賽居然1球都入唔到，啞晒火咁，今仗就算想穩守突擊都無能為力啦！