艾美利亞 艾爾切駁火做大騷

猪拉多纳

兩支新升班嘅艾美利亞同艾爾切開季兩戰同得1分，今晚雙方喺西甲狹路相逢，都想搶3分為護級打好基礎，肯定唔會打守勢波。最緊要係兩軍今周同樣得到星級進攻球員加盟，主場出擊嘅艾美利亞有葡萄牙國腳希達巴保沙來投；艾爾切則有加納射手耶當保亞基強化鋒線，鬥攻點會少入波？今場一於博2.05倍入球大啦！（開賽時間：周六清晨5:00）
各有星級箭頭加盟

艾美利亞今夏增添9名新兵，其中前線分別向利物浦同巴塞隆拿B隊借用蘇索同洛迪里奧斯，前線當堂生猛晒，特別係洛迪里奧斯上陣兩場已經入咗3粒，唔嘢小o架！唯一可惜係班波防線麻麻，兩場失咗5球，今場佢哋贏唔贏到波實在難講，但加入埋布拉加借將希達巴保沙，進攻更多瓣數，要射爆艾爾切條豆腐防線有幾難？
雙方同樣不設防

艾爾切係上季西乙冠軍，不過今季開咧戰作客吞咗華歷簡奴3蛋，上仗亦只能踢和留力歐聯嘅皇家蘇斯達1:1，防線唔多掂。佢哋條鋒線本來實力唔算突出，不過前日佢哋就成功向祖雲達斯借用加納新星耶當保亞基，據聞此子今晚仲可能披起9號波衫擔正，火力提升下，有力同艾美利亞合演入球騷。