黃色潛艇食住個勢o趙華拉

猪拉多纳

今晚西甲第2輪賽事，重返甲組嘅維拉利爾會喺主場迎戰華拉度列，「黃色潛艇」上星期重返西甲第一擊隨即敲響勝鼓，新加盟嘅墨西哥國腳杜斯山度士又入波又助攻盡顯身價，家陣班波士氣大振，返到主場有力再下一城，3倍「讓球主勝」又點可以錯過呀？

（開賽時間：周日清晨5:00）
墨西哥孖寶有料到

維拉利爾喺西乙短短「休息」咗一季後，立即重返甲組戰場，一班跟隨球會降落西乙嘅球星，好似卡尼、般奴蘇利安奴等絕對功不可沒。同時，今季由馬略卡加盟嘅墨西哥國腳杜斯山度士亦重振雄風，踢番當年出道被喻為「新細哨」嘅水準，配合由「黃色潛艇」回收返嚟嘅查維亞阿基路，呢對「墨西哥喪攻孖寶」又年輕又有腳法，加上佢哋同聲同氣兼老友鬼鬼，默契一流，絕對係維拉利爾今季最煞食嘅武器，今晚「張峰」睇好佢哋可以再次合力炮製士哥。

對家華拉度列今季變動唔算太大，查維亞古艾拿、艾拔同奧斯卡干沙里斯等好波之人留效，中前場人腳尚算完整。不過上季有唔錯表現嘅門將丹尼靴南迪斯同後衞白蘭斯奧加離隊，始終對防線有一定影響，首輪主場1:2輸畀畢爾包就係一個警號，睇嚟今季由利雲特來投嘅新帥桑馬天尼斯，真係要喺後防方面花啲心思喇。