哥帥Mode愈Run愈好 拜仁強鋒摧毀紐倫堡

猪拉多纳

德甲開咧兩星期，上季冠、亞軍拜仁同多蒙特已經彈咗上前兩席，當中拜仁雖然兩連勝，但仍然畀人批評踢唔出上季嘅霸氣，之不過，小弟覺得哥迪奧拿六月底先接手，依家能夠Keep住開W，已經好難得，舒韋恩史迪加等主將都話已經開始熟習新陣，依家嘅拜仁，就好似支等緊起飛嘅火箭咁，今晚面對表現低迷嘅紐倫堡，係時候贏鑊勁嘅振一振士氣喇，「-2」照捧1.69倍「讓球主勝」啦！

（有線61、64、201及203、中央5台周六晚9:30直播）
紐倫堡3戰失5粒

拜仁上星期小勝法蘭克福一球，即刻畀球迷鬧爆，都幾陰功。小弟覺得Fans們真係要畀多少少耐性，等班球員有充足時間去Run熟「哥帥Mode」，只要過多一排，到時嘅拜仁肯定無堅不摧！賽前「小豬」都走出嚟話，佢同班隊友都開始摸到條路，前鋒文迪蘇傑解凍後，更加係連續兩場聯賽有「士哥」，配合新過檔、今晚好大機會披甲嘅馬里奧葛斯、一路都弗嘅列貝利同洛賓，拜仁好恐怖呀！今晚只要發揮正常，贏3粒真係「最低消費」啦！

相反，紐倫堡開咧後表現麻麻，繼德國盃畀低組別球隊辛特侯遜踢走後，頭兩場聯賽都要去到絕境先逼和對手，日本球星清武弘嗣表現對辦又點？班後防球員都唔集中，畀對手搓兩搓就散晒，開季3場對住唔算難踢嘅對手都要失5球，清武曉飛都唔掂啦！今晚佢哋去到安聯，隨時未踢已經腳軟，準備抬蛋啦！
頂占筍盤：拜仁慕尼黑（讓球主勝）