漢諾威喪攻博「大」「慕」

猪拉多纳

迪奧夫留隊士氣好
上星期德甲開鑼，咁多隊當中，我覺得最令人眼前一亮嘅就係漢諾威。呢隊實力分子陣中有唔少高質素攻擊球員，會方日前仲宣布唔會為錢賣走主力前鋒馬美迪奧夫，可見佢哋係幾咁有決心去爭取好成績。今晚漢諾威作客對住鋒力都唔弱嘅慕遜加柏，小弟相信兩軍會合演入球騷，一於捧1.72倍入球大啦！（有線61、64、201及203周日凌晨0:30直播）

慕遜新兵夾到艾蘭高
慕遜加柏一開咧就被班霸拜仁慕尼黑炒1:3，咁講真，呢場波佢哋輸就預咗o架啦，反而佢哋喺拜仁身上攞到1個入球，表現已經唔算差喎，從首戰可見，拉菲爾基達奴同麥斯古斯兩件新兵，同原有主力艾蘭高組成嘅進攻線默契唔錯，今次返到主場，更加要喺班擁躉面前贏番鋪入多兩粒，進攻決心唔成疑問。

漢諾威季前大事增兵
作客嘅漢諾威都唔曳，佢哋喺上星期輕取禾夫斯堡兩蛋，雖然耶高蘭同法蘭卡因傷缺陣，但球會季前買入唔少當打球員，呢輪就好使好用喇！好似前鋒比頓確特、中場艾加派比等，都係實而不華嘅球星，至於盛傳受到史篤城垂青嘅馬美迪奧夫，球會更公開話明唔會放人，鋒力咁有保證，作客都有能力同慕遜加柏鬥數胡。

頂占筍盤：慕遜加柏（入球大）