卡迪夫城搵錢撻韋斯咸

猪拉多纳

英超升班馬卡迪夫城今晚作客鬥韋斯咸，威爾斯球隊卡迪夫城喺馬來西亞富商陳志遠支持下，首次殺上英超，雄心壯志，季前大事增兵，先後以破球會轉會費紀錄，收購熱刺後衞哥爾卡及西維爾中場加利美度，擺明要大展拳腳。反觀韋斯咸莫財，領隊艾拿戴斯限米煮限飯，未踢已先輸氣勢，讓唔起對手，力捧1.85倍卡迪夫城「讓球客勝」。

（now 625周六晚10時直播）

富商班主陳志遠猛掃貨

陳志遠三年前入主卡迪夫城後，不斷投資增兵，提升球隊實力，終於喺上季以英冠盟主身分，獲得英超參賽權。相隔51年後重返頂級聯賽，陳志遠更加樂意大灑金錢買人，一早講明起碼用2500萬鎊掃貨。近期先後以800萬鎊及1100萬鎊簽下哥爾卡同加利美度，並羅致丹麥前鋒哥尼利斯、打比郡後衞巴福特，配合比拿美、費沙甘保，陣容夠晒完整。

至於韋斯咸買斷安祖卡路爾及羅致另一位利物浦球員達寧後，大股東大衞蘇利雲即刻閂水喉，話買新兵前，必須先出售球員，搞到領隊艾拿戴斯好冇癮，真係打擊士氣。值得留意，另一支威爾斯球隊史雲斯升上英超後，表現可人，卡迪夫城當然唔想畀對方搶晒風頭，勢必大打爭氣波，值得期待。