造福亞洲球迷 皇馬撼畢爾包打早場

猪拉多纳

西甲又造福亞洲球迷！為咗開拓亞洲市場，西甲今季繼續推出「超早場」賽事，賽會喺前日公布嘅第3輪賽程中，皇馬大戰畢爾包嘅賽事將會喺香港時間傍晚6點上演，唔使捱眼瞓都有得睇！

球迷票選C朗奪金靴
持有最大西甲轉播權嘅Mediapro曾宣布會推出愈嚟愈多早場賽事，以照顧亞洲球迷嘅需要，其中皇馬亦一直積極配合呢項安排，所以今季首場超早場由「銀河艦隊」擔大旗亦都係意料中事。根據西甲賽會前日公布嘅第3輪賽程，皇馬將會喺香港時間9月1日傍晚6點（西班牙時間中午12:00）喺主場迎戰畢爾包，一眾亞洲嘅「皇馬躉」就可以精精神神咁睇愛隊比賽，唔使捱更抵夜喇！

西甲開鑼在即，西班牙《馬卡報》亦特別就「誰會奪得西甲金靴」搞咗個投票，喺尋晚截稿前，C朗拿度仍以近5成嘅得票率，力壓緊隨其後嘅美斯暫列球迷心目中嘅「一哥」，至於第3名嘅韋拿只獲約4%票數，排第4嘅尼馬更僅得1%，證明大部分球迷都覺得今季仍然會係「兩大天王」嘅世界。