赫斯喜伯年水鬥水獻細

猪拉多纳

歐洲各大聯賽陸續開咧，阿King睇中今晚蘇超頭場赫斯於主場迎戰喜伯年，前者因為財困關係，不但被扣十五分，陣中主力亦相繼離隊，不過喜伯年喺歐霸慘敗後未回魂，今仗名副其實係海軍鬥水兵，細盤好路。（周日晚7時05分開賽）

串禾寧丹大聖伊天上盤

蘇格蘭球隊一向窮到燶，赫斯上季已經不斷傳拖糧消息，今夏因為財困問題愈來愈嚴重，被賽會接管之餘，喺新球季更要負十五分起步，陣中好多球員為生計紛紛跳船，包括射手約翰塞頓，實力、士氣嚴重受損。不過對手喜伯年亦唔好得幾多，之前喺歐霸外圍賽兩回合慘吞瑞典超球隊馬模九隻光蛋，其中主場輸0比7之役，更係奇恥大辱，上周聯賽開咧戰又敗給馬瑟韋爾，成班波輸到慌晒，眾將信心跌到新低點，今仗好難撕破一心死守嘅赫斯防線，累鬥累格局最好捧入球細。

至於荷乙獨腳戲禾寧丹主場對鹿特丹斯巴達，禾軍保持一貫有前冇後打死罷就踢法，箭頭羅拔穆倫上仗大演帽子戲法，腳風順到冇朋友，但鹿特丹斯巴達同樣攻強守弱，隨時大駁火，大盤有計。最後法甲阿些斯奧主場硬撼聖伊天，聖軍為備戰歐霸提早開操，球員已經上力，其中巴西前鋒白蘭達奧寶刀未老，頻有士哥，就算阿些斯奧有前祖雲達斯「白頭佬」拉雲拿利揸旗都冇有怕，小讓平半非常值博。