摩納哥15億猛虎出柙

猪拉多纳

負分起步追殺波爾多
有錢唔係萬能，但冇錢就萬萬不能！暑假與巴黎聖日耳門（ＰＳＧ）大玩「軍備競賽」嘅升班球隊摩納哥，今晚喺法甲首輪作客波爾多，由於摩軍被扣兩分起步，若想挑戰ＰＳＧ嘅王者地位，務必盡快收復失地，好彩佢哋重金請來「波圖三寶」法卡奧、占士洛迪古斯及摩天奴，質素超晒班，小讓平半博得過。

（now 714周日凌晨3時直播）

在俄羅斯富豪魯博洛夫列夫呢支大水喉射住之下，摩納哥今夏豪花1.44億歐元（約15億港元）擴軍，比使咗1.14億歐元嘅聖日耳門仲要多，其爭霸野心路人皆知。豈料未開波先吃一記悶棍，上季摩納哥於乙組對勒芒之役因發生球迷騷亂，因此畀賽會扣咗三分，雖然有一分為緩刑執行，但仍要以負兩分起步。

「波圖三寶」默契一流
不過，摩軍主帥雲尼亞里勝在兵多將廣，唔單止有射術精湛嘅馬體會箭頭法卡奧，其身邊仲有兩名前波圖隊友占士洛迪古斯及摩天奴，三人夾慣夾熟夠晒默契，唔愁破關乏術。

上周法冠盃波爾多演出唔曳，可惜質素所限，畀聖日耳門喺補時階段反勝，亦反映出就算ＰＳＧ及摩納哥狀態未弗，只要佢哋班球星肯砌，法甲冇乜邊隊能抵擋得住。波爾多上周輸畀ＰＳＧ已經元氣大傷，今晚仲要遇上急於搶分嘅摩納哥，睇嚟都係冇運行，摩軍個上盤有2.04倍分頭唔錯，有買趁早。