布魯日華星當旺要捧場

猪拉多纳

王上源波蘭再爭士哥
中國超新星王上源歐霸盃博上位！歐霸盃外圍賽第三圈首回合賽事，比利時勁旅布魯日作客波蘭球隊施拉斯克，布軍中國球員王上源有望擔正攻堅，呢個小將剛喺聯賽處子戰射入靚絕士哥協助球隊贏波，成功入選比甲首輪最佳陣容，乘勇出戰有力再做英雄！

（周五凌晨2時45分開賽）

中國足球陷入低潮，但其實有唔少內地新星於歐洲球壇靜靜起革命，成都小將王楚早前喺歐霸盃為盧森堡球會祖尼斯屢建奇功，今次輪到另一超新星王上源出場。司職前鋒嘅王上源年僅20歲，上年正式展開職業生涯，以10個士哥成為中乙球隊北京三高首席射手，今年四月獲邀去英超富豪球會曼城試腳，六月再到比利時球會布魯日試腳，上月終獲布魯日聘用，成功喺比利時落班。

轟世界波入選比甲最佳陣容
王上源加入布魯日後即被委以重任，球會上周開咧首場聯賽主場對查內爾，呢位九十後小將正選打足全場，更喺65分鐘射入一記靚絕世界波，表現可圈可點，佢被選入比甲首輪最佳陣容，成為當地球壇紅人。布魯日今次轉戰歐霸盃，王上源有望再次擔正攻堅，佢話明唔會畀勝利沖昏頭腦：「取得入球當然興奮，但一切已成過去，我會以清醒狀態迎接另一對手。」

布魯日今次作客波蘭球隊施拉斯克，將會面對考驗，施拉斯克上圈輕取黑山球隊路達柏夫爾查，展現不俗攻力，不過，布魯日歐戰經驗豐富，而且有狀態大勇嘅王上源在陣，有力反客為主！

比甲華星王上源
年齡：20歲

出生地：河南鄭州

身高：1米85

體重：77公斤

位置：前鋒

効力球會：布魯日（比甲）

偶像：祖亞昆

夢想：參戰世界盃