阿仙奴爭前4強爆韋斯咸

猪拉多纳

今晚英超又有「倫敦打吡」上演，阿仙奴返主場招呼韋斯咸肯定搏甩髀。上場輸畀車路士之後，「兵工廠」又創出恥辱紀錄，領隊雲格承認再失分連前4名都保唔住，當然要開2.12倍「讓球主勝」止血。（有線200、300及廣東體育周四凌晨3:45直播）

阿仙奴日前喺雪戰以1:2不敵車路士，開季22場聯賽得34分，繼續刷新領隊雲格16年以來最差開季紀錄，同時今季對前列5大對手得1和4負，原本口硬嘅佢終於認低威，承認再失分嘅話，相信連爭前4名踢下屆歐聯都做唔到，而且非常迷失咁回應傳媒，話暫時仲未搵到啱心水球員收購。

咁即係話，兵工廠搶分止血只能夠靠地莊，雖然仲未知上場患感冒缺陣嘅普多斯基同阿歷士張伯倫到底好番晒未，但剛續約嘅禾確特繼續有料到，個人近15次上陣勁入11球，足夠攻破韋斯咸大門。
錘仔幫遇兵工廠例冇運行

對家韋斯咸嘅安祖卡路爾未好番，邁加又去咗踢非國盃，所以要借用「兵工廠」前鋒查馬克補充火力，只可惜因借用條例所限無緣倒戈，今仗繼續要靠卡頓高爾數胡。睇番過去打吡戰成績，韋斯咸對阿仙奴向來冇運行，連續5次對賽輸波，期間有3次至少淨輸兩球，對上兩次碰頭先後被禾確特射爆，睇得出打法被食住，唔適宜冷敲。