漩渦唔齊腳難讓櫪木

猪拉多纳

12/11/2011
文： 蘇豪

日乙尚餘四周，榜首雙雄FC東京同鳥棲砂岩帶出，升班機會高，餘下一席成德島漩渦及札幌岡薩多之爭。德島漩渦戰意鮮明，可惜本周有三位主力停賽，作客讓唔起櫪木SC，捧「讓球主勝」！（周六中午12時開賽）


市原走樣同飛翔捱「細」界


德島漩渦目前與札幌岡薩多同得五十九分，真正叮噹馬頭，鬥到難分難解，絕對一分都不能失。不過，漩渦今場唔齊腳，進攻主力柿谷曜一朗要坐波監，後防重心三木隆司及裴相珍亦需停賽，攻守力同樣受削，作客讓波好牙煙！櫪木SC沉咗好耐，上輪突然翻生作客大炒鳥取飛翔，前線重現火力，今次主場出擊仲惡，有力做攔路虎，「讓球主勝」有計！




同日千葉市原主場對鳥取飛翔，市原爭升班原本形勢大好，但戰至季尾完全走晒樣，對上六戰不勝，近五場加埋只入一球，演出極曳！另一邊廂鳥取飛翔仲衰，近兩場全敗共失九球，後防甩漏多，今次只求輸少當贏，相信會先做好防守。兩軍入球能力一般，預期今場士哥唔多，入球細值得留意。




另外，北九州向日葵主場對熊本羅亞素，向日葵主力池元友樹、森村昂太及福井諒司停賽，實力大減，讓唔起對手，要「讓球客勝」。


日乙推介


櫪木SC讓球勝




熊本羅亞素讓球勝

千葉市原細