威爾斯風流波展威力

猪拉多纳

12/11/2011
文： 笛子波童

今晚另一場國際熱身賽，威爾斯主場迎戰挪威。威爾斯近期喺冇壓力之下愈踢愈好，相反挪威對上三場作客比賽輸波兼食蛋，「讓球主客和」挪威作客讓一球，波童捧威爾斯「讓球主勝」。（周六晚11時開賽）




威爾斯喺早前歐國盃外圍賽頭五輪全敗，一早已經篤定出局，不過自從前國腳史必於去年底接掌帥印，球隊放開包袱之後，表現漸入佳境，於九月及十月上演嘅最後四輪分組賽，威爾斯先後擊敗黑山、瑞士及保加利亞，唯一輸波係作客僅以一球不敵小組首名英格蘭，演出獲一致好評，今次點兵佢哋徵召咗加里夫巴利、比拿美、艾朗藍斯等主力，以最強陣容出戰，實力有保證。


挪威作客有本錢讓波


挪威在歐國盃外圍賽情況啱啱相反，自從佢哋贏晒頭三輪分組賽，最後五輪只得兩勝一和兩負，兩場贏波對手分別係實力較遜嘅冰島及塞浦路斯，演出明顯走下坡，佢哋最大問題係作客水準唔穩定，近三場全部輸晒兼冇入波，試問今場邊有本錢讓波！