馬主錫馬唔放棄金威神童贏番場

博彩老头

所謂「窮則變，變則通」，鄭俊偉真係好明白箇中道理。啱啱上個禮拜三先幫隻老馬「鋼意」重戴眼罩變身贏馬，到咗尋日就輪到「金威神童」除頭罩得手，米高鄭認真足智多謀。
       
鄭俊偉讚自己部署精妙

不過，鄭俊偉賽後講番「金威神童」今鋪順利建功，同換配備冇咩關係，反而馬主唔放棄同埋賽前嘅精心部署先係關鍵。米高鄭話呢隻馬之前跑咗14次，有五次賽後要試閘合格先可以再跑，擺明健康有問題，所以佢上季尾建議馬主不如畀隻馬退役。
       

不過，馬主梁秀芝好錫馬，唔想愛駒退役，米高鄭話既然係咁，就索性畀心機練好佢，仲一早將目標鎖定今場五班泥地一哩，兩個禮拜前搵定有十磅減嘅何澤堯騎，結果喺各種悉心部署下贏番場，難怪米高鄭都忍唔住大讚自己好嘢。