賠率有路捉：瀟洒威龍有早飛到

港陌

　　頭場五班1000米，早飛大熱門落喺「野馬」身上，肯定眾望所歸，23 蚊亦好合理，但奇就奇在次熱門唔係「搏得過」、「放縱」或者「你好我好」，居然係72蚊W「瀟洒威龍」。

　　呢隻馬表面上七戰全負，但留意上周開鑼日起用韋達跑1200 米，只得10 倍，明顯有啲信心，結果沿途快跟下跑第七，只係輸三個幾馬位，係有史以嚟名次最好，輸得最近一役。昨日早飛亦有支持，改用楊明綸，擺明貪嗰七磅搶放，小心今日真係飛到馬又到呀。

　　胡森馬房仲未開齋，今日大陣仗派九駒列陣，斷估唔會隔岸觀火，留意噚日早飛「信賴」及「綠色超凡」都買到40蚊左右熱門，呢樣都唔算意外，最驚人係兩駒位置都係1.0，即係話孭起成個位置彩池，有人一早落定大注注墊底飛，何方聖神咁有信心，要小心呢注聰明錢。

騎師王捧楊明綸

　　騎師王方面，韋達同柏寶都熱唔透， 開盤手暗示冇餐士，相反牌仔楊明綸騎九場，坐騎「瀟洒威龍」有計外，「辣得喜」、「中華英雄」及「大家開心」都係牌面馬，甚至乎「偉龍」及「金鑽龍華」都有冷P 機會，加上賠率有肉食，捧得過。

周仲